Xəbərlər

Dil və ədəbiyyat kafedrasının professoru Arzu Hüseynovanın yubileyi qeyd olundu

Sumqayıt Dövlət Universitetinin Rektorluğu və Həmkarlar İttifaqı Komitəsi universitetin Dil və ədəbiyyat kafedrasının professoru Arzu Hüseynovanı yubileyi münasibətilə təbrik edib. Arzu Hüseynovaya səmərəli əmək fəaliyyətinə görə və yubileyi münasibətilə Fəxri fərman və hədiyyə təqdim olunub.

İyulun 9-da Sumqayıt Dövlət Universitetinin Elmi Şurasının növbəti iclası Elm və Təhsil İşçiləri Həmkarlar İttifaqı Respublika Komitəsinin tabeliyində fəaliyyət göstərən Təhsil İstirahət Mərkəzinin konfrans zalında baş tutdu

İyulun 9-da Sumqayıt Dövlət Universitetinin (SDU) Elmi Şurasının növbəti iclası keçirilib. İclas Xaçmaz rayonunun Nabran qəsəbəsində yerləşən Elm və Təhsil İşçiləri Həmkarlar İttifaqı Respublika Komitəsinin tabeliyində fəaliyyət göstərən “Təhsil” istirahət mərkəzinin konfrans zalında baş tutub.

İclası açan universitetin rektoru, texnika elmləri doktoru, professor Nurəli Yusifbəyli gündəlikdə duran məsələlər barədə məlumat verərək onların universitetin strateji inkişaf prioritetlərinə uyğun formalaşdırıldığını bildirib. Qeyd olunub ki, gündəlik cari tədris ilinin yekunlarının qiymətləndirilməsi, növbəti akademik ilə hazırlıq və universitetdə təhsil, elm və idarəetmə fəaliyyətinin təkmilləşdirilməsinə yönəlmiş strateji məsələləri əhatə edir.

İclasda ilk olaraq 2025/2026-cı tədris ilinin yekunları müzakirə olunub. Elm və innovasiyalar üzrə prorektor, dosent Elşad Abdullayev yaz semestrinin imtahan sessiyasının ilkin nəticələrini təqdim edib. Daha sonra struktur bölmələrinin rəhbərləri və fakültə dekanları hesabatlarla çıxış edərək tədris ili ərzində həyata keçirilən fəaliyyətlər, əldə olunan nəticələr və qarşıda duran vəzifələr barədə məlumat veriblər. Elmi Şuranın əvvəlki qərarlarının icra vəziyyəti də diqqətə çatdırılıb.

Növbəti akademik ilə hazırlıq çərçivəsində 2026/2027-ci tədris ili üçün Akademik Təqvim Planı və yenilənmiş tədris planları müzakirə olunaraq Elmi Şuranın qərarı ilə təsdiq edilib.

İclasda universitetdə institusional inkişafın gücləndirilməsinə xidmət edən bir sıra təşəbbüslər də təqdim olunub. Rektor professor Nurəli Yusifbəyli diferensial əməkhaqqı sisteminin tətbiqi və əməkdaşların innovativ təşəbbüslərinin dəstəklənməsinə yönəlmiş “SDU FİKİR BANKI – 1000 İDEYA, 1 SDU” layihəsi barədə məlumat verib. Keyfiyyətin təminatı və strategiya şöbəsinin müdiri Mədinə Abışova Strateji İnkişaf Planının indikatorlar üzrə icra vəziyyətini təqdim edib. Beynəlxalq əməkdaşlıq və strateji layihələr şöbəsinin müdiri Aysel Eminova isə universitetin QS və THE beynəlxalq reytinqlərində mövqeyinin yaxşılaşdırılması istiqamətində həyata keçirilən tədbirlər və qarşıdakı hədəflər barədə məlumat verib.

İclas çərçivəsində 2026–2030-cu illəri əhatə edəcək Strateji İnkişaf Planının hazırlanması, universitetin prioritet elmi istiqamətlərinin müəyyənləşdirilməsi, idarəetmə strukturunun müasir tələblərə uyğun təkmilləşdirilməsi və Elmi-Metodik Şuranın yaradılması ilə bağlı məsələlər də müzakirə olunub. Həmçinin Polimer Materialları İnstitutunun Sumqayıt Dövlət Universitetinin tabeliyində fəaliyyətinin təşkili ilə bağlı təqdimat dinlənilib. Müzakirələrin yekununda gündəlikdə yer alan bütün məsələlər üzrə müvafiq qərarlar qəbul edilib. Qəbul olunan qərarların icra mexanizmləri, monitorinqi və qarşıdakı dövr üzrə fəaliyyət istiqamətləri müəyyənləşdirilib.

Sonda rektor professor Nurəli Yusifbəyli universitetin strateji inkişaf hədəflərinin həyata keçirilməsində kollektivin fəal iştirakının əhəmiyyətini vurğulayaraq, müəyyən edilmiş əsas fəaliyyət istiqamətləri üzrə işlərin ardıcıl və koordinasiyalı şəkildə davam etdirilməsinin vacibliyini qeyd edib.

Sumqayıt Dövlət Universitetində “Məzun günü” təntənəli mərasimlə qeyd olunub

Sumqayıt Dövlət Universitetində “Məzun günü” təntənəli mərasimlə qeyd olunub

Sumqayıt Dövlət Universiteti növbəti məzunlarını böyük qürur və sevinc hissi ilə həyata yola salır. İyunun 30-da universitetin əsas tədris binasının qarşısında keçirilən “Məzun günü” mərasimi ali təhsil həyatının mühüm mərhələsini başa vuran gənclər üçün əlamətdar hadisə olub.

Tədbirdə Sumqayıt Şəhər İcra Hakimiyyəti başçısının birinci müavini Teymur Səmədov, Milli Məclisin Elm və təhsil komitəsinin sədri Anar İsgəndərov, Milli Məclisin İctimai birliklər və dini qurumlar komitəsinin sədri Fazil Mustafa, Dövlət Məşğulluq Agentliyinin İdarə Heyətinin sədri Hasil Abbasov, Parlament Jurnalistlər Birliyinin sədri Elşad Eyvazlı, professor-müəllim heyəti, universitetin tərəfdaş qurumlarının nümayəndələri, məzunlar və onların valideynləri iştirak ediblər.

Ənənəyə uyğun olaraq tədbir iştirakçıları əvvəlcə Ümummilli Lider Heydər Əliyevin büstü önünə və Vətən uğrunda canından keçmiş SDU məzunlarının xatirəsinə ucaldılmış abidə kompleksinə gül dəstələri düzərək ehtiramlarını ifadə ediblər.

Azərbaycan Respublikasının Dövlət Himninin səsləndirilməsi ilə başlayan mərasimdə Ümummilli Lider Heydər Əliyevin və Azərbaycanın ərazi bütövlüyü uğrunda şəhid olmuş qəhrəmanların əziz xatirəsi dərin ehtiramla yad olunub.

Tədbirdə çıxış edən universitetin rektoru professor Nurəli Yusifbəyli 

məzunları əldə etdikləri bilik və bacarıqları ölkənin inkişafına, elmə, innovasiyalara və cəmiyyətin tərəqqisinə yönəltməyə çağırıb. Bildirilib ki, SDU məzunları müasir əmək bazarının tələblərinə uyğun peşəkar hazırlıq, yüksək mənəvi dəyərlər və vətəndaş məsuliyyəti ilə yeni fəaliyyət mərhələsinə qədəm qoyurlar.

Qeyd olunub ki, universitetin əsas prioritetlərindən biri keyfiyyətli təhsil mühitinin formalaşdırılması, elmi-tədqiqat fəaliyyətinin genişləndirilməsi və əmək bazarı ilə sıx inteqrasiyanın təmin edilməsidir. Bu istiqamətdə həyata keçirilən ardıcıl tədbirlər SDU-nun nüfuzunun və rəqabətqabiliyyətliliyinin daha da yüksəlməsinə xidmət edir.

Mərasimdə universitetin sənaye və xidmət sektorunda fəaliyyət göstərən tərəfdaşları – “Veysəloğlu” Şirkətlər Qrupu, “Azərsun Holdinq” MMC, “Badamlı”, “Red Bull”, “VMF”, “Edu Company” təhsil şirkəti, “Bakcell”, “İydə Parfum” mağazalar şəbəkəsi və “Osmanlı” restoranlar şəbəkəsinin nümayəndələri də iştirak edərək məzunları təbrik ediblər.

“Məzun günü” mərasimi universitetin tələbələrinin hazırladığı rəngarəng bədii proqramla davam edib.

Sumqayıt Dövlət Universiteti bundan sonra da ölkənin inkişaf prioritetlərinə uyğun yüksək ixtisaslı, innovativ düşüncəli və rəqabətqabiliyyətli mütəxəssislərin hazırlanması istiqamətində fəaliyyətini uğurla davam etdirəcək

SDU HİK-in üzvlərinin yubileyləri qeyd olundu

Sumqayıt Dövlət Universitetinin Rektorluğu və Həmkarlar İttifaqı Komitəsi universitetin Kimya mühəndisliyi və ekologiya kafedrasının dosenti İradə Qarayevanı, Fəlsəfə, sosiologiya və politologiya kafedrasının müəllimi Nailə Qasımovanı yubileyləri münasibətilə təbrik etdi. Əməkdaşlara səmərəli əmək fəaliyyətlərinə görə və yubileyləri münasibətilə Fəxri fərman və hədiyyə təqdim olundu.

SDU-da 26 İyun – Azərbaycan Respublikası Silahlı Qüvvələrinin Yaradılması Günü qeyd olunub

SDU-da 26 İyun – Azərbaycan Respublikası Silahlı Qüvvələrinin Yaradılması Günü qeyd olunub

İyunun 25-də Sumqayıt Dövlət Universitetində (SDU) 26 İyun – Azərbaycan Respublikası Silahlı Qüvvələrinin Yaradılması Günü münasibətilə elmi-praktik seminar keçirilib.

Tədbir iştirakçıları əvvəlcə universitetin ərazisində yerləşən şəhid-məzunların abidə kompleksini və Ümummilli Lider Heydər Əliyevin abidəsini ziyarət edərək önünə gül dəstələri qoyublar.

SDU-nun Heydər Əliyev Mərkəzində davam edən tədbirdə Azərbaycan Silahlı Qüvvələrinin şərəfli inkişaf yolunu əks etdirən videoçarx nümayiş olunub.

Seminarı giriş sözü ilə açan SDU-nun rektoru, texnika elmləri doktoru, professor Nurəli Yusifbəyli Azərbaycan Ordusunun yaranma tarixindən, milli ordu quruculuğu prosesindən və Silahlı Qüvvələrimizin keçdiyi mühüm inkişaf mərhələlərindən bəhs edib.

Rektor qeyd edib ki, dövlət müstəqilliyimizin bərpasından sonra Ümummilli Lider Heydər Əliyevin həyata keçirdiyi uzaqgörən siyasət Azərbaycan Ordusunun formalaşması və güclənməsi üçün möhkəm təməl yaradıb. O, Ulu Öndərin ölkəyə ilk rəhbərliyi dövründə milli zabit kadrlarının hazırlanması istiqamətində mühüm rol oynayan Cəmşid Naxçıvanski adına hərbi liseyin yaradılmasını xüsusi vurğulayıb.

Professor Nurəli Yusifbəyli bildirib ki, həmin strateji yanaşmanın məntiqi nəticəsi 2020-ci ildə baş vermiş 44 günlük Vətən müharibəsində əldə olunan tarixi Qələbə olub. Silahlı Qüvvələrin Ali Baş Komandanı, Azərbaycan Respublikasının Prezidenti İlham Əliyevin rəhbərliyi ilə Azərbaycan Ordusu ərazi bütövlüyümüzün bərpasına nail olaraq xalqımıza möhtəşəm Zəfər sevinci yaşadıb.

Rektor çıxışında vurğulayıb ki, hər bir dövlətin suverenliyinin və təhlükəsizliyinin əsas təminatçılarından biri güclü Silahlı Qüvvələrdir. Bu baxımdan ali təhsil müəssisələrinin qarşısında mühüm vəzifələrin dayandığını qeyd edən rektor, zamanın çağırışlarına cavab verən, yüksək ixtisaslı və vətənpərvər kadrların hazırlanmasının əsas prioritetlərdən biri olduğunu diqqətə çatdırıb.

Tədbirdə çıxış edən Ədliyyə polkovnik-leytenantı, Sumqayıt Hərbi Prokurorunun müavini Tural Həsənli Azərbaycan Ordusunun 108 illik şərəfli tarixindən, onun dövlətçilik və milli təhlükəsizlik baxımından əhəmiyyətindən danışıb. O, ordumuzun 30 ilə yaxın işğal altında qalan torpaqlarımızın azad edilməsində, eləcə də ölkəmizin hüquqi mövqeyinin təmin olunmasında mühüm rol oynadığını bildirib.

Daha sonra II Qarabağ müharibəsinin iştirakçısı, Vətən Müharibəsi Qəhrəmanı Vüsal Yaqubov, SDU-nun Tarix və coğrafiya fakültəsinin dekanı, professor Adil Baxşəliyev, Riyaziyyat fakültəsinin tələbəsi, 44 günlük Vətən müharibəsi qazisi Rahil Xəlilov və digər çıxışçılar Azərbaycan Silahlı Qüvvələrinin xalqımız və dövlətimiz qarşısındakı tarixi missiyasından, ordumuzun keçdiyi şərəfli yoldan və gənclərin vətənpərvərlik ruhunda yetişdirilməsinin əhəmiyyətindən bəhs ediblər.

SDU rektoru şəhid anası ilə görüşüb

SDU rektoru şəhid anası ilə görüşüb

Sumqayıt Dövlət Universitetinin rektoru, texnika elmləri doktoru, professor Nurəli Yusifbəyli universitetin əməkdaşı, Vətən müharibəsi şəhidi Fərhad Əliyevin anası Tacə Vahabovanı qəbul edib.  

Görüş zamanı rektor şəhid anasının qayğıları ilə maraqlanıb, onu Azərbaycan Silahlı Qüvvələrinin yaradılmasının 108-ci ildönümü münasibətilə təbrik edib. O, şəhid ailələrinin hər zaman dövlətimizin xüsusi diqqət və qayğısı ilə əhatə olunduğunu vurğulayaraq, SDU rəhbərliyinin də bu ailələrə həssas münasibət göstərdiyini qeyd edib.  

Tacə Vahabova dövlətin şəhid ailələrinə və qazilərə göstərdiyi diqqətə görə minnətdarlığını ifadə edib, görüşdən məmnunluğunu bildirib. Görüşün sonunda Tacə Vahabovaya SDU adından xatirə hədiyyəsi təqdim olunub və xatirə fotosu çəkilib.

20 İyun 2026-cı il tarixində Sumqayıt Dövlət Universiteti Həmkarlar İttifaqı Komitəsinin təşkilatçılığı ilə universitetin İqtisadiyyat və idarəetmə fakültəsinin əməkdaşları üçün Şamaxı rayonuna bir günlük gəzinti təşkil olunmuşdur.

20 İyun 2026-cı il tarixində Sumqayıt Dövlət Universiteti Həmkarlar İttifaqı Komitəsinin təşkilatçılığı ilə universitetin İqtisadiyyat və idarəetmə fakültəsinin əməkdaşları üçün Şamaxı rayonuna bir günlük gəzinti təşkil olunmuşdur. Belə tədbirlərin təşkili Həmkarlar İttifaqı Komitəsinin əsas fəaliyyət istiqamətlərindən biri kimi əməkdaşların kollektiv ruhunun möhkəmləndirilməsinə və sosial rifahının yüksəldilməsinə xidmət edir

Sumqayıt Dövlət Universitetində Milli Qurtuluş Gününə həsr olunmuş elmi-praktik seminar keçirilib

İyunun 12-də Sumqayıt Dövlət Universitetində 15 İyun – Milli Qurtuluş Gününə həsr olunmuş “Yeganə çıxış yolu – Böyük Xilaskarın tarixi qayıdışı” mövzusunda elmi-praktik seminar təşkil olunub.

Tədbir iştirakçıları əvvəlcə Ümummilli lider Heydər Əliyevin universitet ərazisində ucaldılmış büstü önünə gül dəstələri düzərək onun əziz xatirəsini ehtiramla yad ediblər. Daha sonra Milli Qurtuluş Gününə həsr edilmiş videoçarx nümayiş olunub. Seminarı giriş sözü ilə açan SDU-nun rektoru, texnika elmləri doktoru, professor Nurəli Yusifbəyli 15 İyun – Milli Qurtuluş Gününün Azərbaycan tarixində mühüm dönüş mərhələsi olduğunu vurğulayıb. O bildirib ki, 1993-cü ildə xalqın təkidli tələbi ilə Ümummilli lider Heydər Əliyevin siyasi hakimiyyətə qayıdışı ölkədə ictimai-siyasi sabitliyin bərpasına, dövlət müstəqilliyinin qorunmasına və davamlı inkişaf strategiyasının formalaşdırılmasına əsaslı zəmin yaradıb. Rektor qeyd edib ki, taleyüklü tarixi hadisələrin mahiyyətinin gənc nəslə düzgün şəkildə çatdırılması əsas vəzifələrdən biridir. O, Ulu öndər Heydər Əliyevin Azərbaycanın gələcəyi naminə həyata keçirdiyi dövlətçilik siyasətinin öyrənilməsinin və gələcək nəsillərə ötürülməsinin vacibliyini xüsusi vurğulayıb. Eyni zamanda təhsil və elmin dövlətin inkişafında fundamental rol oynadığını diqqətə çatdıran rektor universitetin bu istiqamətdə fəaliyyətinin daim prioritet olduğunu bildirib və iştirakçılara Milli Qurtuluş Günü münasibətilə təbrikini çatdırıb. Azərbaycan Respublikası Milli Məclisinin 45 saylı Sumqayıt dördüncü seçki dairəsindən seçilmiş deputatı Səbinə Salmanova çıxışında 15 iyunun müasir Azərbaycan tarixinin ən əlamətdar mərhələlərindən biri olduğunu qeyd edib. O vurğulayıb ki, ölkədə mürəkkəb ictimai-siyasi vəziyyətin hökm sürdüyü bir dövrdə Heydər Əliyevin hakimiyyətə qayıdışı Azərbaycanı parçalanma təhlükəsindən xilas edib, dövlət quruculuğu prosesinə yeni impuls verib və ölkənin gələcək inkişafının əsasını formalaşdırıb. Deputat bildirib ki, həmin dövrdə müəyyənləşdirilən siyasi kurs sonrakı illərdə ölkənin hərtərəfli inkişafını təmin edib, Prezident İlham Əliyevin rəhbərliyi ilə isə Azərbaycan tarixi zəfərə nail olub. Milli Müdafiə Universitetinin professoru, elmi katib Yəhya Babanlı çıxışında Milli Qurtuluş Gününün Azərbaycanın dövlətçilik tarixində, eləcə də müdafiə və milli təhlükəsizlik sisteminin formalaşdırılmasında mühüm əhəmiyyət kəsb etdiyini diqqətə çatdırıb. O bildirib ki, Ümummilli lider Heydər Əliyevin uzaqgörən və məqsədyönlü siyasəti nəticəsində ölkədə möhkəm dövlətçilik əsasları yaradılıb, milli maraqlara əsaslanan inkişaf strategiyası müəyyənləşdirilib. Bu siyasi kursun nəticəsində Azərbaycan Respublikası öz ərazi bütövlüyünü və suverenliyini tam bərpa edib. Seminar çərçivəsində Tarix və coğrafiya fakültəsinin dekanı, Əməkdar müəllim Adil Baxşəliyev “Milli sabitliyin bərpasında Heydər Əliyevin antiböhran strategiyası”, magistrant Nübar Osmanova isə “Milli Qurtuluşdan Tarixi Zəfərə: uğurla davam edən müstəqil siyasi kurs” mövzularında məruzələrlə çıxış ediblər. Məruzələrdə Milli Qurtuluşun Azərbaycan dövlətçiliyinin möhkəmləndirilməsindəki rolu, eləcə də həmin siyasi kursun ölkənin inkişafına verdiyi töhfələr geniş təhlil olunub. Tədbirin sonunda iştirakçıları maraqlandıran suallar cavablandırılıb, mövzu ətrafında fikir mübadiləsi aparılıb və MMU tərəfindən ərsəyə gətirilən “Tarixi Qələbə - Vətən müharibəsinin xronikası” kitabı təhsil ocağına təqdim edilib. 

SDU HİK-in üzvü Fəridə Ağayevanın yubileyi qeyd edildi

Sumqayıt Dövlət Universitetinin Rektorluğu və Həmkarlar İttifaqı Komitəsi universitetin İnformasiya texnologiyaları kafedrasının müəllimi Fəridə Ağayevanı yubileyi münasibətilə təbrik etdi. Fəridə Ağayevaya səmərəli əmək fəaliyyətinə görə və yubileyi münasibətilə Fəxri fərman və hədiyyə təqdim olundu.

Sumqayıt Dövlət Universitetində 28 May – Müstəqillik Gününə həsr olunmuş elmi-praktik seminar keçirilib

28 May – Müstəqillik Günü münasibətilə Sumqayıt Dövlət Universitetində “Azərbaycan dövlətçiliyi: müstəqillikdən Zəfərə” mövzusunda elmi-praktik seminar təşkil olunub.

Əvvəlcə Azərbaycan Respublikasının Dövlət Himni səsləndirilib, Ümummilli Lider Heydər Əliyev və Vətən uğrunda canlarını fəda etmiş şəhidlərin əziz xatirəsi bir dəqiqəlik sükutla yad edilib.

Tədbiri giriş nitqi ilə açan SDU-nun rektoru, texnika elmləri doktoru, professor Nurəli Yusifbəyli 28 May tarixinin Azərbaycan dövlətçilik tarixində xüsusi əhəmiyyət daşıdığını vurğulayıb. Rektor qeyd edib ki, Azərbaycan Xalq Cümhuriyyətinin yaradılması xalqımızın milli iradəsinin, azadlıq düşüncəsinin və müasir dövlətçilik ənənələrinin formalaşmasının mühüm mərhələsidir. Bildirilib ki, bu tarixi irs müasir Azərbaycanın siyasi, hüquqi və institusional inkişafının əsas dayaqlarından birini təşkil edir.

Çıxış zamanı vurğulanıb ki, müstəqil Azərbaycan dövlətinin davamlı inkişafı və möhkəmlənməsi Ümummilli Lider Heydər Əliyev tərəfindən müəyyən edilmiş dövlətçilik strategiyasına əsaslanır. Bu siyasi kursun Azərbaycan Respublikasının Prezidenti İlham Əliyev tərəfindən müasir çağırışlara uyğun şəkildə uğurla davam etdirildiyi qeyd olunub. Rektor Azərbaycanın beynəlxalq nüfuzunun güclənməsi, milli maraqların qətiyyətlə müdafiə olunması və ölkəmizin beynəlxalq platformalarda layiqincə təmsil edilməsinin həyata keçirilən uğurlu dövlət siyasətinin nəticəsi olduğunu diqqətə çatdırıb.

Daha sonra Milli Məclisin Təbii ehtiyatlar, energetika və ekologiya komitəsinin sədri Sadiq Qurbanov “Azərbaycanın istiqlal mübarizəsi və milli dövlətçiliyin təşəkkülü” mövzusunda məruzə ilə çıxış edib. Məruzədə Azərbaycan Xalq Cümhuriyyətinin müsəlman Şərqində ilk parlamentli demokratik respublika olduğu, qadınlara seçki hüququ verən ilk dövlətlərdən biri kimi tarixə düşdüyü vurğulanıb. Bildirilib ki, cəmi 23 ay fəaliyyət göstərməsinə baxmayaraq, Azərbaycan Xalq Cümhuriyyəti milli dövlətçilik tariximizin mühüm siyasi və ideoloji mərhələsini təşkil edir.

Deputat qeyd edib ki, Azərbaycan Xalq Cümhuriyyətinin tarixi-siyasi irsinə fundamental qiymət məhz Ümummilli Lider Heydər Əliyev tərəfindən verilib və müasir Azərbaycan Respublikası həmin dövlətin siyasi varisi kimi inkişaf edir. O, Prezident İlham Əliyevin rəhbərliyi ilə dövlətçilik ənənələrinin uğurla davam etdirildiyini də diqqətə çatdırıb.

Seminarda çıxış edən Sumqayıt Şəhər İcra Hakimiyyəti başçısının birinci müavini Teymur Səmədov Müstəqillik Gününün tarixi əhəmiyyətindən danışaraq, Azərbaycanın dövlət müstəqilliyinin qorunması və möhkəmləndirilməsi istiqamətində Ümummilli Lider Heydər Əliyevin müstəsna xidmətlərini qeyd edib. Bildirilib ki, Prezident İlham Əliyevin rəhbərliyi ilə ölkəmiz bütün sahələrdə dinamik inkişaf yolunu uğurla davam etdirir.

Daha sonra Azərbaycan və Şərqi Avropa xalqları tarixi kafedrasının müdiri, professor Şirxan Səlimov “Ulu Öndər Heydər Əliyev – müasir Azərbaycanın suveren inkişaf modelinin müəllifi”, Tarix və coğrafiya fakültəsinin tələbəsi Ellada Zərgərova isə “İlham Əliyev – xalqı müstəqillik və inkişaf yolunda irəli aparan lider” mövzularında məruzələrlə çıxış ediblər.

Çıxışlarda Azərbaycan dövlətçiliyinin tarixi inkişaf mərhələləri, milli suverenliyin möhkəmləndirilməsi istiqamətində həyata keçirilən siyasət, eləcə də ölkəmizin müasir dövrdə əldə etdiyi sosial-iqtisadi və siyasi nailiyyətlər geniş şəkildə təhlil olunub.

Seminar iştirakçılar tərəfindən maraqla qarşılanıb, mövzu ətrafında geniş fikir mübadiləsi aparılıb.

Mayın 15-də Sumqayıt Dövlət Universitetinin (SDU) kampusunda iməclik keçirilib.

SDU-da iməclik keçirilib

Mayın 15-də Sumqayıt Dövlət Universitetinin (SDU) kampusunda iməclik keçirilib.

İməclikdə universitetin rəhbərliyi, professor-müəllim heyəti, inzibati heyət üzvləri və tələbələr iştirak ediblər. Kampus ərazisində həyata keçirilən tədbir çərçivəsində ağaclara qulluq olunub, yaşıllıq sahələrində abadlıq işləri aparılıb, ərazidə təmizlik işləri görülüb.

İştirakçılar tərəfindən ağacların dibi yumşaldılıb, kampusun ekoloji vəziyyətinin daha da yaxşılaşdırılması və ətraf mühitin qorunması istiqamətində müxtəlif tədbirlər həyata keçirilib.

Tədbirin sonunda iştirakçılar çay süfrəsi arxasında bir araya gələrək səmimi fikir mübadiləsi aparıblar.

SDU-da “Heydər Əliyev ideyalarının işığında – çiçəklənən Azərbaycan” adlı elmi-praktik seminar keçirilib

Mayın 8-də Sumqayıt Dövlət Universitetində(SDU) Ümummilli Lider Heydər Əliyevin anadan olmasının 103 illiyinə həsr olunmuş “Heydər Əliyev ideyalarının işığında – çiçəklənən Azərbaycan” adlı elmi-praktik seminar keçirilib.

Tədbirdən əvvəl universitet rəhbərliyi və qonaqlar Ulu Öndər Heydər Əliyevin universitetdə ucaldılmış büstü önünə gül dəstələri qoyaraq onun əziz xatirəsini ehtiramla yad edib, daha sonra universitetin foyesində təşkil olunmuş fotosərgi ilə tanış olublar.

Seminar SDU-da fəaliyyət göstərən Heydər Əliyev Mərkəzində davam edib. Tədbirdə əvvəlcə Ümummilli Lider Heydər Əliyevin əziz xatirəsi bir dəqiqəlik sükutla yad olunub.

Seminarı giriş sözü ilə açan Sumqayıt Dövlət Universitetinin rektoru, texnika elmləri doktoru, professor Nurəli Yusifbəyli Ümummilli Lider Heydər Əliyevin Azərbaycan dövlətçiliyinin formalaşması, milli-mənəvi dəyərlərin qorunması və təhsil sisteminin inkişafı istiqamətində misilsiz xidmətlərindən bəhs edib. Rektor qeyd edib ki, Heydər Əliyev ideyaları bu gün də Azərbaycanın inkişaf strategiyasının əsasını təşkil edir və həmin siyasi kurs Prezident İlham Əliyev tərəfindən uğurla davam etdirilir.

Professor Nurəli Yusifbəyli çıxışında təhsilin dövlətin strateji inkişafında xüsusi yer tutduğunu vurğulayaraq bildirib ki, Ulu Öndərin rəhbərliyi dövründə ali təhsilin inkişafına göstərilən diqqət Azərbaycan gəncliyi üçün böyük intellektual məktəbin formalaşmasına səbəb olub. O, həmin siyasətin nəticəsi olaraq minlərlə azərbaycanlı gəncin keçmiş SSRİ-nin nüfuzlu ali məktəblərində təhsil almaq imkanı əldə etdiyini, bu gün isə Prezident İlham Əliyevin rəhbərliyi ilə xaricdə təhsil üzrə dövlət proqramlarının uğurla davam etdirildiyini diqqətə çatdırıb.

Rektor, həmçinin qeyd edib ki, müasir dövrdə ali təhsil müəssisələrinin qarşısında duran əsas vəzifələrdən biri ölkənin inkişafına xidmət edən bilikli, yüksək intellektual potensiala malik və milli dəyərlərə sadiq kadrların hazırlanmasıdır.

Daha sonra Yeni Azərbaycan Partiyası Sumqayıt şəhər təşkilatının sədri Ramiz Hüseynov “Heydər Əliyevin xilaskarlıq missiyası” mövzusunda məruzə ilə çıxış edib. O, Ümummilli Liderin Azərbaycanın dövlət müstəqilliyinin qorunmasında, milli ruhun dirçəldilməsində, ana dilinin inkişafında və milli kimliyin möhkəmləndirilməsində tarixi rolundan bəhs edib. Bildirib ki, Heydər Əliyev həm sovet dövründə, həm də müstəqillik illərində Azərbaycan ziyalılarına göstərdiyi diqqət və həyata keçirdiyi strateji islahatlarla ölkənin gələcək inkişafının möhkəm təməlini formalaşdırıb.

Seminarda İqtisadiyyat və idarəetmə fakültəsinin dekanı, dosent Loğman Abdullayev “Heydər Əliyevin Azərbaycan iqtisadiyyatı və sənayesinin yüksəlişini təmin edən strateji islahatları və idarəetmə modeli” mövzusunda çıxış edərək Ulu Öndərin iqtisadi inkişaf strategiyasının ölkənin sənaye potensialının güclənməsində mühüm rol oynadığını vurğulayıb.

Abşeron-Xızı Regional Gənclər və İdman İdarəsinin rəisi Telman Kərimov isə “Heydər Əliyevin mədəniyyət, incəsənət və idmanın inkişafına göstərdiyi dövlət qayğısı” mövzusunda çıxış edərək Ümummilli Liderin milli-mədəni irsin qorunması, gənclərin inkişafı və idmanın dövlət siyasətinin əsas istiqamətlərindən birinə çevrilməsi sahəsində həyata keçirdiyi tədbirlərdən danışıb.

Seminarın sonunda Ümummilli Lider Heydər Əliyevin anadan olmasının 103 illiyinə həsr olunmuş esse müsabiqəsinin qalibləri mükafatlandırılıb.